कार्ला एकविरा मंदिर परिसराचा होणार कायापालट, कार्ला फाटा येथे उभारणार ओव्हर ब्रिज,,, खासदार बारणे..

मावळ (प्रतिनिधी): मावळ तालुक्यातील अनेक गावातील , आदिवासी पाड्यांना जोडणाऱ्या रस्त्यांचा मार्ग मोकळा झाला आहे . वन विभागाच्या जागेतून जाणाऱ्या रस्त्यांसाठी जिल्हा वनसंरक्षक अधिकारी , जिल्हाधिकारी यांनी तत्काळ परवानगी देण्याची तयारी दर्शविली आहे . तसेच आई एकविरा देवी मंदीर परिसर विकासासाठी 24 कोटी रुपयांचा निधी मिळाला आहे.

एमएसआरडीसीच्या माध्यमातून आणखी निधी उपलब्ध होणार आहे . त्यामुळे मंदिर परिसराचा कायापालट होईल . याशिवाय वाहतूक कोंडी आणि अपघातांचा ‘ ब्लॅकस्पॉट ‘ होत असलेल्या कार्ला फाटा येथे ओव्हर ब्रीज उभारण्यात येणार असल्याची माहिती खासदार श्रीरंग बारणे यांनी दिली.

मावळ तालुक्यातील अनेक प्रलंबित प्रश्नांबाबत खासदार श्रीरंग बारणे यांनी बुधवारी दि. 7 रोजी जिल्हा प्रशासनासोबत बैठक घेतली . प्रशासनाला विविध सूचना दिल्या.

खासदार श्रीरंग बारणे यावेळी बोलताना म्हणाले , ” मावळातील अनेक गावातील रस्ते वनविभागाच्या जागेतून जातात . वन विभागाचे स्थानिक अधिकारी रस्त्याचे काम करुन देत नाहीत . मशिन उचलून नेतात . त्यामुळे अनेक वर्षांपासून आदिवासी पाड्यांकडे जाणाऱ्या रस्त्यांचे काम प्रलंबित आहे . माझ्या अधिकारातील सर्व परवानग्या तात्काळ देतो . काही परवानग्या केंद्र सरकार देते . त्याबाबतचे प्रस्ताव तयार करुन पाठवितो , असे जिल्हाधिकाऱ्यांनी सांगितले . रस्त्यांची कामे अडवू नये अशा वनरक्षक अधिकाऱ्यांना सूचना देण्यात आल्या .

त्यामुळे वनविभागाच्या जागेतून जाणाऱ्या रस्त्यांची रखडलेली कामे मार्गी लागणार आहेत . केंद्र सरकारच्या परवानग्या मिळण्यासाठी मी पाठपुरावा करणार आहे . त्यामुळे अनेक वर्षांपासून रखडलेला रस्त्यांचा प्रश्न निकाली निघणार आहे ”.

पर्यटनाला चालना आणि भाविकांना चांगल्या सोयी सुविधा एकविरा देवी मंदीर परिसरात देण्यात येणार असल्याचे ” खासदार बारणे यांनी सांगितले . मावळात गडकोट किल्ले , लोणावळा – खंडाळा अशी विविध पर्यटन ठिकाणे आहेत . त्यामुळे पर्यटकांची मोठी गर्दी असते . कायदा सुव्यवस्था अबाधित ठेवावी . पर्यटकांना यंत्रणेचा कोणताही त्रास होवू नये . पर्यटकांच्या वाहनांसाठी वाहनतळाची व्यवस्था करावी . काही अनुचित प्रकार घडला . तर , तत्काळ मदत करावी , अशा सूचना पोलिसांना दिल्याचेही त्यांनी सांगितले .

एकविरा देवी मंदीर परिसराच्या विकासासाठी महाराष्ट्र रस्ते विकास महामंडळ ( एमएसआरडीसी ) च्या माध्यमातून निधी देण्याच्या सूचना मुख्यमंत्र्यांनी दिल्या होत्या . 24 कोटी रुपयांचा निधी सुशोभीकरणासाठी दिला आहे . पुरातत्व विकासाच्या सहमतीने विकास कामे केली जाणार आहेत . त्यामध्ये पायऱ्या दुरुस्त , दर्शन शेड उभारणे , पिण्याचे पाणी , स्वच्छतागृहाची कामे केली जाणार आहेत . भाविकांच्या वाहनांसाठी वनखाते आणि खासगी जागेत वाहनतळाची तत्काळ व्यवस्था करण्याची सूचना मुख्यमंत्र्यांनी दिली आहे .

कार्ला फाट्यावर मोठ्या प्रमाणात वाहतूक कोंडी होते . सातत्याने अपघातही होतात . हा अपघातांचा ‘ ब्लॅकस्पॉट ‘ झाला आहे . याबाबत मुख्यमंत्री एकनाथ शिंदे यांच्यासोबत नुकतीच चर्चा झाली . ओव्हर ब्रीज उभारण्याची विनंती केली होती . त्यावर मुख्यमंत्री शिंदे यांनी तातडीने कार्ला येथे ओव्हर ब्रीज उभारण्याबाबतचा प्रस्ताव सादर करण्याच्या सूचना एमएसआरडीसीचे व्यवस्थापकीय संचालक राधेश्याम मोपलवार यांना दिल्या . राष्ट्रीय राजमार्ग प्राधिकरण ( एनएचएआय ) ने हा रस्ता राज्य सरकारकडे हस्तांतरित केला नाही . केवळ देखभाल दुरुस्तीसाठी दिला आहे.

.त्यामुळे ओव्हर ब्रीज उभारण्यासाठी एनएचएआयचे ना हरकत प्रमाणपत्र ( एनओसी ) केंद्रीय मंत्री नितीन गडकरी यांच्याकडून मी घेणार आहे . त्यामुळे लवकरच कार्ला फाट्यावर ओव्हर ब्रीज उभारण्याच्या कामाला सुरुवात होईल,त्याचबरोब मावळात धरण परिसरातील 13 गावांना स्मशानभूमीला जागा उपलब्ध नव्हती . एखाद्याचे निधन झाल्यास अंत्यसंस्कार कोठे करायचे असा प्रश्न गावकऱ्यांसमोर होता . त्यामुळे टाटा पावरने स्वत : च्या मालकीची जागा देण्याची तयारी दर्शविली आहे . त्याबाबतचा प्रस्ताव जिल्हाधिकाऱ्यां कडे पाठविला आहे . जिल्हाधिकाऱ्यांनी त्याला तात्काळ मान्यता देण्याची तयारी दर्शविली.

त्यामुळे या 13 गावात स्मशानभूमी विकसित करण्याचा मार्ग मोकळा झाला आहे . तसेच घोडेश्वर येथे पशुवैद्यकीय दवाखान्यासाठी एक जागा देण्याचाही निर्णय घेतला . पुणे जिल्ह्यातील बाह्यवळण ( रिंगरोड ) रस्त्यामध्ये गेलेल्या जागेचा मोबदला बाजारभावापेक्षा कमी मिळाल्याच्या तक्रारी चांदखेड आणि पाचाणे गावातील शेतकऱ्यांच्या आहेत. त्याचा फेरआढावा घेवून त्रुटी दूर केल्या जातील . शेतकऱ्यांना न्याय दिला जाईल , अशी ग्वाही जिल्हाधिकाऱ्यांनी दिल्याचे ” ही खासदार बारणे यांनी सांगितले.

सदर बैठकीस जिल्हाधिकारी डॉ . राजेश देशमुख , पुणे ग्रामीण पोलीस अधिक्षक अंकित गोयल , जिल्हा वनसंरक्षक अधिकारी राहुल पाटील , प्रांतअधिकारी संदेश शिर्के , तहसिलदार मधूसुदन बर्गे , गटविकास अधिकारी एस.पी.भागवत,बी. बी.दरवडे , उपअभियंता धनराज पाटील , जिल्हा नियोजन अधिकारी किरण इंदलकर , उप जिल्हाधिकारी भूसंपादन प्रवीण साळुंखे , कार्यकारी अभियंता ओ.बी. पाटील,तहसीलदार धनंजय जाधव , बाळासाहेबांच्या शिवसेनेचे जिल्हाप्रमुख बाळासाहेब वाल्हेकर , उपजिल्हाप्रमुख शरद हुलावळे , तालुका प्रमुख राजेश खांडभोर , शहरप्रमुख निलेश तरस , विशाल हुलावळे , राजेंद्र तरस उपस्थित होते.