” निखिल ७ स्टार – इंदिरानगर दहीवली दिमाखात प्रथम “

कर्जत अंडरआर्म बॉक्स ” क्रिकेट प्रीमियर लीग २०२५ – पर्व २ ” जल्लोषात !

” आमदार महेंद्र शेठ थोरवे ” यांची प्रमुख उपस्थिती..

भिसेगाव – कर्जत ( सुभाष सोनावणे )कर्जत हे मैदानी खेळ व क्रिकेटचे ” माहेरघर ” आहे . ” क्रिकेटचा उत्साह, तरुणाईचा जोश आणि कर्जतच्या एकतेचं प्रतीक ” ठरलेली ” कर्जत नगरपरिषद अंडरआर्म बॉक्स क्रिकेट प्रीमियर लीग २०२५ – पर्व २ ” या स्पर्धेचा समारोप सोहळा मोठ्या थाटात आणि जल्लोषात पार पडला. या अंतिम दिवशी कर्जत – खालापूरचे कार्यसम्राट आमदार श्री. महेंद्र शेठ थोरवे यांनी विशेष उपस्थिती लावून उपस्थित खेळाडूंना दाद आणि प्रेक्षकांना प्रेरणा दिली. या बहुचर्चित स्पर्धेचे आयोजन आमदार महेंद्र शेठ थोरवे यांच्या वाढदिवसानिमित्त १८ एप्रिल ते २० एप्रिल २०२५ असे करण्यात आले होते. या पर्वात तब्बल ३२ संघांनी सहभाग नोंदवून स्पर्धेला एक वेगळा दर्जा आणि ओळख प्राप्त करून दिली. स्पर्धे दरम्यान रंगलेली चुरस, संघांतील खेळाडूंचा झोकून दिलेला सहभाग आणि प्रेक्षकांचा प्रचंड प्रतिसाद हेच या भव्य आयोजनाचं यश दाखवून देत होतं.

समारोपप्रसंगी आमदार महेंद्र थोरवे यांनी आपल्या भाषणात उपस्थितांचे मनापासून पाठिंबा दिल्याबद्दल आभार मानले. “ क्रिकेट हा संघभावनेचा आणि जिद्दीचा खेळ आहे. या स्पर्धेने केवळ खेळ नाही, तर आपली एकता आणि ऊर्जा दाखवली आहे. कर्जत शहराचा पर्यटनदृष्ट्या नवा चेहरा घडवण्यासाठी तुमच्या साथीने मी निश्चयाने पुढे चाललो आहे. कर्जतचे ” नंदनवन ” केल्याशिवाय मी शांत बसणार नाही,” असा विश्वास आमदार महेंद्र शेठ थोरवे ह्यांनी याप्रसंगी दिला . ही स्पर्धा आयोजित करण्यामध्ये मोलाचा वाटा असणाऱ्या शिवसेना कर्जत शहर सर्व पदाधिकारी व कार्यकर्त्यांचे विशेष कौतुक त्यांनी केले. आपण एक चांगल्या दर्जाची स्पर्धा आयोजित केली आणि खेळाडूंना व्यासपीठ दिलं आहे. यामधून भविष्यात अनेक क्रिकेटर घडतील आणि संपूर्ण कर्जतकरांना त्याचा अभिमान वाटेल , असे मत व्यक्त केले.

याप्रसंगी नगरसेवक ॲड. संकेत भासे म्हणाले की , कर्जतकरांनी पुन्हा एकदा विश्वासाने आमदार महेंद्र शेठ थोरवे यांच्यावर दाखवलेल्या विश्वासाबद्दल कृतज्ञता व्यक्त केली आणि या स्पर्धेच्या यशस्वी आयोजनासाठी सर्व सहकाऱ्यांचे मन:पूर्वक आभार मानले. यावेळी स्पर्धेतील विजेते प्रथम क्रमांक – निखिल ७ स्टार – इंदिरानगर दहीवली , द्वितीय क्रमांक – आई एकविरा ब्लास्टर – गुंडगे गाव , तृतीय क्रमांक – रिधा ब्रदर्स एफ.सी.सी. – पंचशील नगर , चतुर्थ क्रमांक – जुनेरा आनम ७ स्टार – दहीवली , या विजेत्या संघांचे पारितोषिक व भव्य आकर्षक ट्रॉफी देऊन गौरविण्यात आले . स्पर्धेच्या मैदानावर उभी राहिलेली तरुणाईची ऊर्जा आणि प्रेक्षकांचा जल्लोष हा स्पर्धेच्या इतिहासात सुवर्णक्षण होता.

या समारोप सोहळ्याला शिवसेना कर्जत शहरचे सर्व पदाधिकारी, संघमालक, खेळाडू आणि शेकडो कर्जतकर प्रेक्षक मोठ्या संख्येने उपस्थित होते. ” युवा खेळाडूंना व्यासपीठ मिळवून देणारा हा उपक्रम दरवर्षी अधिक भव्य स्वरूपात राबवण्याचा आमचा संकल्प आहे ,” असा निर्धारही यावेळी शिवसेना पदाधिकर्यांनी व्यक्त केला .