कर्जत नगरीत ” भजन सम्राट गजानन बुवा पाटील स्मारक ” उभे करणार – आमदार महेंद्रशेठ थोरवे..

बाळासाहेबांची शिवसेना आयोजित दिवाळी संध्या २०२२ कार्यक्रम संपन्न…

भिसेगाव- कर्जत ( सुभाष सोनावणे ) कर्जत नगरी ही सांस्कृतिक वारसा लाभलेली संगीत क्षेत्रातील पंढरी आहे , म्हणूनच येथे नवनवीन कलाकार उदयास येत असून पूर्वापार चालत आलेले भजन क्षेत्रातील महाराष्ट्राचे सुप्रसिद्ध ” भजन सम्राट गजानन बुवा पाटील ” हे या मातीत जन्माला आले.

त्यांचे स्मरण व्हावे व माझे बाबा ह भ प सदाशिव बुवा थोरवे यांचे इच्छेखातर लवकरच या संगीत क्षेत्रातील रत्नाच्या नावाने ” गजानन बुवा पाटील स्मारक ” उभारणार असल्याचे कर्जत – खालापूर मतदार संघाचे कार्यसम्राट आमदार महेंद्रशेठ थोरवे यांनी उपस्थित कर्जत तालुक्यातील संगीत क्षेत्रातील कलाकारांच्या व भजन सम्राट गजानन बुवा पाटील यांच्या चाहत्यांच्या समोर प्रतिपादन केले , बाळासाहेबांची शिवसेना कर्जत शहर आयोजित दिवाळी संध्या २०२२ या सदाबहार गीतांच्या कार्यक्रमात प्रमुख पाहुणे म्हणून उपस्थित राहून , त्या ठिकाणी ते बोलत होते.

दिपावली उत्सावानिमित आमदार महेंद्रशेठ सदाशिव थोरवे व ” बाळासाहेबांची शिवसेना ” कर्जत शहर यांच्या वतीने ऍड. संकेत भासे , नगरसेवक कर्जत नगर परिषद व कर्जत शहर प्रमुख अभिषेक सुर्वे यांनी विवेक भागवत निर्मित दिवाळी संध्येचे आयोजन श्री कपालेश्वर मंदिर येथे बहारदार गीतांचा कार्यक्रम आयोजित केला होता.

यावेळी सुप्रसिद्ध गायक ऍड.अनिरुद्ध भिडे , संगीत सम्राट फेम अभिषेक नलावडे , सुप्रसिद्ध गायिका दिपाली देसाई , सूर नवा ध्यास नवा फेम सई जोशी आणि सुप्रसिद्ध निवेदक अनुया गरवारे धारप व वादक – हार्मोनियम अनिरुद्ध भिडे , सिंथेसाईझर ओंकार देवस्कर , ऑक्टोपैड प्रविण भोपी , ढोलक – ढोलकी प्रविण कदम , तबला विवेक भागवत यांच्या तालबद्ध साथीने भावगीत – भक्तिगीत – लावणी – शांता शेळके , लता मंगेशकर , हृदयनाथ मंगेशकर , यांची गीते यावेळी कलाकारांनी सुंदर आवाजात सादर केली.

या कार्यक्रमास कर्जत शहरातील अनेक रसिक प्रेक्षक उपस्थित होते. या निमित्ताने आमदार महेंद्रशेठ थोरवे यांनी उपस्थित राहून कोरोना सारखा कठीण प्रसंग पार करून आपण येथवर आलो , या मतदार संघाचा आमदार म्हणून माझ्या मायबाप मतदारांसाठी लाखो रुपयांचा निधी आणून सर्वांची सुरक्षा केली हे सांगत सर्वांना दिवाळीच्या हार्दिक शुभेच्छा त्यांनी दिल्या.

यावेळी कर्जत शहरप्रमुख अभिषेक सुर्वे व नगरसेवक संकेत भासे यांनी या स्वरबरसात इव्हेंट प्रस्तुत दिवाळी संध्या २०२२ या कार्यक्रमाचे आयोजन केले होते .यावेळी बाळासाहेबांची शिवसेनेचे उपजिल्हाप्रमुख भाई गायकर , तसेच अनेक पदाधिकारी व शिवसैनिक उपस्थित होते.