कुरवंडे रस्त्यावर 15 वर्षीय शालेय विध्यार्थ्यावर जीवघेणा हल्ला, हल्लेखोर फरार…

लोणावळा(प्रतिनिधी) : कुरवंडे रोडवर ट्युशन वरून घरी जाणाऱ्या एका शालेय विद्यार्थ्यावर अज्ञात व्यक्तीने जीवघेणा हल्ला केल्याची घटना मंगळवार दि.13 रोजी रात्री 8 ते 9 वा. च्या सुमारास घडली. हल्लेखोराने विध्यार्थ्याच्या डोक्यात काहीतरी टणक वस्तू मारल्याने सदरचा विद्यार्थी रक्ताच्या थारोळ्यात पडला असताना हल्लेखोर अंधाराचा फायदा घेऊन पसार झाला.

मयूर तानाजी फाटक (वय 15, रा. कुरवंडे ) असे जखमी झालेल्या विध्यार्थ्याचे नाव आहे.याप्रकरणी लोणावळा शहर पोलीस ठाण्यात भादंवी कलम 326 , 506 प्रमाणे अज्ञात व्यक्तीवर गुन्हा दाखल करण्यात आला आहे . याप्रकरणी जखमी मुलाचे वडिल तानाजी फाटक यांनी लोणावळा शहर पोलीस ठाण्यात तक्रार दिली आहे.तीन महिन्यापुर्वी फाटक यांच्या मुलांना विनाकारण काही युवक त्रास देत होते.

याबाबत त्यांनी सदर मुलांना भेटून समजविण्याचा प्रयत्न केला असता त्यांनी फाटक यांना मारण्याची धमकी दिली होती . तसेच तुमची मुले या रस्त्याला भेटली तर आम्ही त्यांना दाखवतो असे धमकावले होते . त्यानंतर मंगळवारी मयुर हा सायंकाळी ट्युशन वरून घरी येत असताना रात्रीच्या अंधारात ही घटना घडली आहे . जखमी मुलावर पुण्यातील एका खाजगी रुग्णालयात उपचार सुरु आहेत . याप्रकरणी फाटक यांनी दोन युवकांची संशयित म्हणून नावे दिली असून लोणावळा शहरचे पोलीस निरीक्षक सिताराम डुबल यांच्या मार्गदर्शनाखाली या घटनेचा तपास सुरु आहे.