मानव सेवा बहुउद्देशीय संस्थेच्या वतीने कर्जत रेल्वे स्थानकावर अन्न दान वाटप !

भिसेगाव- कर्जत ( सुभाष सोनावणे ) कर्जत तालुक्यात सामाजिक उपक्रमात नेहमीच अग्रेसर राहून गोरगरीब व गरजू नागरिकांसाठी झटणारी ” मानव सेवा बहुउद्देशीय संस्थेच्या ” वतीने नेहमीच विविध उपक्रम राबविले जातात . यावेळी दरवर्षीप्रमाणे महामानव डॉ. बाबासाहेब आंबेडकर यांच्या ६७ व्या महापरिनिर्वाण दिनी ६ डिसेंबर रोजी दादर चैत्यभूमी येथे अभिवादन करण्यासाठी लाखोंच्या संख्येने उपस्थित राहून पुन्हा परतीच्या वाटेकडे जात असलेल्या आंबेडकरी अनुयायी , बहुजन समाजाला व इतर समाजातील गोरगरीब व गरजूंना कर्जत रेल्वे स्थानकावर ७ डिसेंबर रोजी मानव सेवा बहुउद्देशीय संस्थेच्या वतीने अन्नदानाचे वाटप करण्यात आले. यावेळी अनेक आंबेडकरी अनुयायांनी व प्रवाशांनी या अन्नदानाचा लाभ घेतला.

मानव सेवा बहुउद्देशीय संस्थेच्या अध्यक्षा सौ. सविता दिपक जगताप या नेहमीच सामाजिक बांधिलकी जपत अल्पदरात कॉम्प्युटर क्लास ,शिवण क्लास , रक्तदान शिबिर , आरोग्य शिबीर , १४ एप्रिल रोजी खाऊ वाटप असे उपक्रम राबवित असतात. दरवर्षी ” चैत्यभूमी दादर ” येथून विश्वरत्न डॉ. बाबासाहेब आंबेडकर यांना अभिवादन करून परतणाऱ्या बहुजन वर्ग व प्रवाशांना तसेच इतर समाज वर्गाला कर्जत रेल्वे स्थानकावर अन्नदान हा कार्यक्रम करतात.

यावेळी संस्थेच्या अध्यक्षा सौ. सविता दिपक जगताप यांच्या मार्गदर्शनाखाली सौ. कांचन रविंद्र धारगावे , प्रभु रायभोळे , ईश्वर भालेराव , राहुल सूर्यवंशी , चंद्रकांत शेंडगे , हिरे , आदी सभासद मंडळ व इतर कार्यकर्ते उपस्थित राहून सर्वांना अन्नदान वाटप केले.