स्वच्छ सर्वेक्षण स्पर्धेत लोणावळ्याने सलग सहाव्या वर्षी मारला पुरस्कारांचा षटकार…

लोणावळा : स्वच्छ सर्वेक्षण 2023 या स्पर्धेत लोणावळा नगरपरिषदेने सलग सहाव्या वर्षी सर्वोत्कृष्ट कामगिरी करत पुरस्काराचा षटकार मारत दिल्लीत आपल्या नावाचा डंका वाजवला आहे.

मागील वर्षी देशात 50 हजार ते 1 लाख लोकसंख्या असलेल्या शहरांच्या गटात सर्वात स्वच्छ शहर म्हणून पहिल्या क्रमांकावर राहण्याचा मिळवलेला मान कायम ठेवत लोणावळा शहराने स्वच्छ सर्वेक्षण 2023 मध्ये 1 लाखापेक्षा कमी लोकसंख्या असलेल्या शहरांच्या गटात देशात तृतीय क्रमांक प्राप्त करत राष्ट्रपतींच्या हस्ते सन्मानित होण्याचा बहुमान मिळविला.

नुकत्याच पार पडलेल्या स्वच्छ सर्वेक्षण 2023 स्पर्धेत संपूर्ण भारत देशात लोणावळा शहरास 1 लाख पेक्षा कमी लोकसंख्या असेलला तृतीय क्रमांक,तर 50 हजार ते 1 लाख लोकसंख्या असलेल्या गटात लोणावळा नगरपरिषदेने प्रथम क्रमांक प्राप्त केला.

यासोबतच या स्पर्धेत सातत्य राखत सलग सहाव्या वर्षी राष्ट्रीय पातळीवर आपले नामांकन टिकवून ठेवत लोणावळा नगरपरिषदेने पुरस्काराचा षटकार मारत दिल्लीत आपल्या नावाचा डंका वाजवला आहे.

गुरूवारी भारत मंडपम नवी दिल्ली येथे पार पडलेल्या स्वच्छ सर्वेक्षण 2023 स्पर्धेच्या पुरस्कार सोहळ्यात माननीय राष्ट्रपती श्रीमती द्रौपदी मुरमु यांच्या शुभहस्ते आणि केंद्रीय नगर विकास मंत्री श्री. हरदीप सिंह पुरी , केंद्रीय नगरविकास राज्य मंत्री श्री कौशल किशोर यांच्या उपस्थितीत लोणावळा नगरपरिषदेला पुरस्कार प्रदान करण्यात आला. लोणावळ्याचे तत्कालीन मुख्याधिकारी श्री पंडित पाटिल , विद्यमान मुख्याधिकारी श्री अशोक साबळे, जिल्हासहआयुक्त श्री. व्यंकटेश दुर्वास, शहर समन्वयक श्री अक्षय पाटील यांनी राष्ट्रपतींच्या हस्ते या पुरस्काराचा स्वीकार केला.

याशिवाय लोणावळा शहरास कचरा मुक्त शहर या श्रेणीमध्ये 3 स्टार रेटिंग व वॅाटर प्लस देखील प्राप्त झाले आहे.

लोणावळा नगरपरिषदेने सलग सहाव्या वर्षी सलग हा पुरस्कार मिळविल्याने याचा आनंद लोणावळेकर नागरिक सोशल मीडियावर मोठ्या उत्साहात व्यक्त करीत आहेत. तसेच हे नेत्रदीपक यश मिळविण्यात सर्व नगरपरिषदेच्या व नागरिकांच्या सांघिक कामगिरीचा महत्वाचा वाटा असून नगरपरिषद अधिकारी, कर्मचारी नगर परिषदेचे आजी माज़ी सर्व लोक प्रतिनिधी , सर्व माध्यम प्रतिनिधी व सर्व नागरिकांचे तत्कालीन मुख्याधिकारी पंडित पाटील व विद्यमान मुख्याधिकारी अशोक साबळे यांनी सर्वांचे आभार मानले.